லெனின் வாழ்க்கை குறிப்புகள் (பரிசல்)

இந்த நூலின் வரலாற்று நாயகன் விளாதிமிர் இலிச்னோவ் என்ற லெனின் அவர்கள் உலக வரலாற்றிலேயே ஒரு சகாப்தத்தையும், வாழ்க்கை முறையையும் அரசியல், சமூக, பொருளாதார அமைப்பு முறைகளையும் தோற்றுவித்த கர்மவீரர்; காலம், இடம் இரண்டையும் சரியாகவும் நேர்மையாகவும் நிலைகலங்காமலும் பயன்படுத்தி, ஏழை மக்கள் உய்யும் பொருட்டு, புரட்சிகரமான புதிய ஒரு சர்க்காரை தீர்மாணிக்க அரும்பாடுபட்டு அதில் வெற்றி கண்ட அண்ணல்; ஞாலம் கருதினும் கைகூடும்; காலம், கருதி இடத்தால் செயின் என்ற வள்ளுவரின் வாய்மொழியை மெய்ப்பித்துக் காட்டிய ஞானி, காலம் என்பது லெனின் போன்ற மேதையைத் தோற்வித்துக் காரியசித்தி பெற்றதா? அல்லது லெனின் போன்ற மேதை காலம் என்பதைச் சரியாகப் பயன்படுத்திக் காரிய சித்தி பெற்றாரா என்பதை ஆராய்ந்து பார்த்தோமானால் அவரிடம் காணப்பட்ட நேர்மையும் நிலைகலங்காமையும் தான் காலம் என்பதைச் சரியாகப் பயன்படுத்திக் கொள்ளவும், காரிய சித்தி பெறவும் லெனினுக்கு ஊன்றுகோல்களாக அமைந்து உதவி செய்திருக்கின்றன என்பதை நாம் காணலாம். இத்தகைய நிலைகலங்காத நேர்மையாளருடன் உடன் வாழ்ந்து அவருடைய இன்ப துன்பங்களில் எல்லாம் பங்குபற்றி நின்ற அவருடைய வாழ்க்கைத் துணைவியார் நதேஷ்தா. தேகுரூப்ஸ்கயா அவர்கள் இந்த வாழ்க்கைக் குறிப்புகளை எழுதி இருக்கிறார். லெனின் எந்தத் தேதியில் பிறந்தார்? எவ்வளவு காலம் வாழ்ந்தார்? உலக வாழ்வை எப்பொழுது நீத்தார்? அவருடன் கூடப்பிறந்தவர்கள் எத்தனை பேர்? அவருடைய தாய் தந்தையர் செய்துவந்த தொழில் என்ன? இவை போன்ற விஷயங்களைப் பற்றி எழுதாமல்,லெனினுக்கும் தொழிலாளருக்கும் பொது வாழ்வில் இருந்த தொடர்பு என்ன? அவர் உருவாக்கிய கம்யூனிஸ்டுக் கட்சி எத்தகையது? அது என்னென்ன காரியங்களை இந்த உலக வரலாற்றில் சாதித்து இருக்கிறது சர்வதேச அரங்கில் அதன் செல்வாக்கு எந்த நிலையில் இருந்து வருகிறது? இவற்றை எல்லாம் பற்றி விரிவாகவும் அழுத்தமாகவும் இந்த நூலில் குரூப்ஸ்கயா அவர்கள் எழுதியிருக்கிறார்கள்.