ஜோவின் நாவல் ஏறத்தாழ முக்கால்நூற்றாண்டின் கதை. புலிச்சுறா பிடிக்கச்சென்று கட்டுமரம் கவிழ்ந்து நீரில் மிதக்கும் மூவர் சிலுவை, சூசை, கோத்ரா ஆகியோரின் கதையின் இடைச்செருகலாக விரிந்துபரவுகிறது நாவல். ஆமந்துறை என்ற சிற்றூர். அங்கிருக்கும் பரதவர்களில் புகழ்பெற்ற மீன்வல்லுநரான தொம்மந்திரை, அவரது நண்பரும் சீடருமான கோத்ரா அவர்களின் தலைமுறைகள் என்று விரிந்து பரவும் இக்கதையில் பரதவரின் வணிகம் மெல்லமெல்ல நாடார் கைக்கு மாறுவதும் தூத்துக்குடி ஒரு முக்கியமான துறைமுகமாக எழுந்துவருவதும் சித்தரிக்கப்பட்டுள்ளது. இந்நாவலின் முக்கியமான சிறப்பம்சம் இது ஒரு சமூகத்தின் , மக்கள்திரளின் கதை என்பதே. முகங்கள் முகங்களாக கதாபாத்திரங்கள் விரிந்தபடியே வருகின்றன. ஒரு கட்டத்தில் பல முகங்களை நம்மால் நினைவில் நிறுத்தமுடியாதபடி. ஒட்டுமொத்த விளைவாக ஒரு கடலோரக் கிராமத்த்தின் முகத்தையே நாம் பார்த்தபடி இருக்கிறோம். இவ்வனுபவத்தை அளிக்கும் தமிழ்நாவல்கள் எண்ணிக்கையில் மிக மிகக் குறைவே.

~நன்றி: ஜெயமோகன்